Estaba desexando que prenderan as luces para
comprobar se os que asistimos a este pase eramos todos individuos de
mediana idade, gafapastas cunha media de seis dioptrías e olleiras a xogo cun
cinsento fular esfiañado. Mágoa. Quedei sen sabelo porque é imposible saír do
cine e non atopar a alguén coñecido que che obriga a unha súbita
deslocalización espazo-temporal. Mentres acordaba ata o o mínimo nivel de educación
que esixe a cortesía puiden escoitar un comentario dunha espectadora que pasaba
ao meu carón. Esta é unha película para pensar, dixo. Recoñezo que case
toda a conversa que mantiven coa antiga coñecida estiven noutro plano, o
da película. Hannah Arendt, cando noviña, presentouse ante o seu admirado Martin
Heidegger para que a aprendera a pensar. Na escea seguinte, o profesor déixase caer e mete a cabeza entre os xeonllos de
Hannah mentres ela lle aloumiña coidadosamente o pelo. Da moi qeu pensar, filosóficamente, digo. Trato de seguir a conversa coa amiga tecendo fíos entre este verbo: pensar. ¿haberá películas nas que non haxa
que pensar? ¿nas que se allea unha da realidade e nas que a película é como un deses trens de autolavado pero para neuronas? ¿por que quería Hannah aprender a pensar? ¿é que
hai que aprender a pensar? ¿canto se tarda en aprender a pensar? ¿apréndese na
universidade a pensar?. Vou rematando a conversa do plano real porque quero seguir
reflexionando, pensando. Alégrome de ter participado nesta especie de milagre de
poder ollar unha película desas que seica son para pensar e nun cine que
programa case exclusivamente películas que che fan pensar. Pero teño
que adiar as miñas cavilacións porque agardan por nós C. e J. Hoxe retomo o tema con gusto. Penso nas miñas lecturas de Hannah Arendt, en todo o que me aclararon
sobre o grande tema, o cerne de case todas as desfeitas que enchen os xornais, unha explicación
mínimamente razoábel para entender o mal. Lembro libros, artigos, videos sobre
a Shoah. Moreas de libros que por mor dunha tese acabaron nesta biblioteca ata facer dela, un auténtico centro de referencia para o tema. De momento case ninguén o sabe, pero iso é outro tema. Lembrei o vídeo
un spécialiste, de Rony Brauman e Eyal Sivan que contén dúas horas do
xuizo de Eichmann. Vin o que viu Hannah Arendt cando fixo aqueles artigos para o
New Yorker que causaron tanto escándalo. E sentinme Hannah Arendt. Qué gustazo!.
Atopei explicacións a moitas dúbidas nese video. Eu tamén vin un velliño con cara de boa persoa que
explicaba con absoluta tranquilidade, non frialdade, ollo, a súa responsabilidade na solución final, ou sexa, na liquidación de milleiros de persoas. O
vello que non é un monstro, explícase moi claramente, non finxe, realmente atópase
só responsable de cumprir ordes non de asasinato ningún. A radicalidade do mal
non existe, di Hanna, só o ben pode ser radical, só o ben goza dunha
profundidade a nivel de pensamento. Releo algún artigos interesantes coma este
de Fernández Buey
sobre o tema e atópolle sentido a cuestións de fondo que cicais expliquen
tamén moitas cousas que están a pasar hoxendía. Sen dúbida hai un denominador
común na orixe do mal. Hai, alomenos, unha condición para infrinxir dano, a de facer totalmente
prescindible, á persoa ou colectivo a danar, a exterminar. Quitarlle non só a
dignidade senón o estatus de ser. Dende aí entendo o parecido entre unha muller
que vai ser acoitelada corenta veces polo home ou uns nenos que van ser gaseados
en Siria ou un xudeo que vai ser exterminado ao baixar dun tren. Quitarlle
importancia ás cousas ten consecuencias verdadeiramente terribles. A banalidade
de que falaba Hannah Arendt ten que facernos pensar certamente.
Suscribirse a:
Enviar comentarios (Atom)
No hay comentarios:
Publicar un comentario